بقلم _ أ. د. فتحي الشرقاوي
ياريت..تفهم وتنفذ…..
مهما وصلت درجة علاقتك بأي شخص..
زميلك ..صديقك.. حبيبك..رفيقك…
وأيا كانت طبيعة علاقتك به…
ياريت ما تقولش إننا بقينا واحد..
لأ..أنتم شخصين اتنين مش واحد…
ما تخلهوش يعرف كل اللي جوه نفسك….
أفكارك ،طموحاتك ، تخطيطاتك ، مشاعرك
يعرف بعضها ماشي..لكن يعرفها كلها بتفاصيلها
لأ وستين ألف لأ
حياتك وخبراتك….ده كنزك اللي لازم تحافظ عليه
احتفظ لنفسك ببعض هذه الأوراق الخاصة.
لنفسك وجوه نفسك وماتتكلمش فيها مع اي حد
ماتخليش خصوصياتك مشاع يعرفها ويتابعها كل من هب ودب.
نتيجة رطرطتك بالكلام معاه تحت شعار أنكم إنتم آلأتنين واحد
ماتكونش كتاب مفتوح لحد يقلب فيه زي ماهو عاوز.
ماتتعراش قدام حد كائنا من كان..لا نفسيا ولا انفعاليا و لاسلوكيا
تحت شعار إنك بتحبه وهو بيحبك..
وعمره ماهيغدر بيك ولا هينقلب عليك
لأ. ..حَرَصْ ولا تخونش
خلى بعض فصول حياتك داخل كتاب حياتك
ماتخليش حد يعرف خزائنه ولا أسراره إلا أنت.
متعرفش حد الأوراق دي ولا كمان تلوحله باللي فيها.
لا كلمه ولا سطر ولا براجراف ولا موضوع.
الأوراق دي هى ملجأك وقت شدتك ووقت تخليه وابتعاده عنك.
افتكر دائماً ان الحد ده لما يهجرك ومعاه بعض منك.
أهون بكتير إنه يهجرك وكلك معاه..
ساعتها بس هتكون عبد ليه وبتجري وراه..
علشان تحصل على إنت اللي ضاعت منك وأصبحت معاه
ياترى الرساله وصلت ..ولا لسه…
أ. د. فتحي الشرقاوي
أستاذ علم النفس … جامعة عين شمس
