بقلم .. أ.د / فتحي الشرقاوي
#اولا :
ماتكونش انت نفسك شخصيتك خفيفه
يعني ماتخليش اللي قدامك ياخد عنك فكرة
إنك شخصية مسطحه..كلمه تجيبه وكلمه توديه.
لازم يحس إنك لو اتكلمت يبقى كلامك ده جد الجد
#ثانيا :
ماتبقاش شخصيتك مرسومه في راس اللي قدامك.
معاكم معاكم ..عليكم عليكم…
لأ..لازم تبقى اتجاهاتك ومواقفك واضحة..
بحيث إللي قدامك يبقى متوقع ردود افعالك لأقواله وأفعاله
وتذكر دايما إن الناس بيطمعوا في اللي مالهمش اتجاهات
ومواقف واراء واضحه وثابته…
#ثالثا :
ماتفضلش على الفاضي والمليان تهزر وتضحك وتهرج وتأفي.
لان السلوك ده ممكن يدي انطباع للي قدامك إنك شخصية ساذجه
ومن السهل الدخول ليها والسيطرة عليها.
مش بقولك ماتكونش انبساطي مرح.
لأ..ماتكونش كده على طول…ياريت تشفت الوش التاني شويه.
#رابعا :
ماتفضلش توعد وماتنفذش لأن البؤق الحمضان ده.
بيخلي اللي قدامك يعتقد ان اخرك مجرد كلام بس
مفيش افعال…وده هيطمعه فيك اكتر واكتر
ومش هيخليه يحسباك اي حساب
#خامسا :
لما حد يدوسلك على طرف وتحس بالإهانه
قوله على طول وماتخافش منه..
انه أهانك..وأنك مش راضي بكده…
وماتضمنش سلوكك معاه هيبقى ايه بعد كده
على فكرة …
لو شاف في عينيك وانت بتكلمه إنك مش خايف منه
صدقني هيعملك الف حساب بعد كده…
#مجرد _خاطره
ا.د.فتحي الشرقاوي
أستاذ علم النفس جامعه عين شمس
