بقلم .. دكتور فتحي الشرقاوي
تحت كلمة العشم دي..
كم من إنتهاكات شخصية ترتكب في حقنا..
تحت كلمة العشم دي
كم من إهدار لحقوقك وضياع لهيبتك…
تحت كلمة العشم دي
يعني إيه ..أنا عشمان فيك….
هو عشمك ده ممكن يخليك متجاوز لحدودك معايا
هو عشمك ده يخليك تقلل من قدري أمام الأخرين
ولما الومك و اعاتبك تقوليلي ..
اصل من عشمي فيك…
ليه الناس بتبلع الإهانات تحت هذا العشم القاتل
كم واحد تتدخل ادق امور حياتك …
وبعدين ببساطه يقولك من عشمي..
كم واحد اتصرف بالنيابة عنك من غير مايقولك و لايستأذنك
كم واحد قيد حريتك تحت كلمة عشم
اللي أنا أعرفه ..إن العشم لا يعطيني الحق
في تجاوزي معاك ولا تجاوزك معي..
اللي أنا أعرفه إن العشم مايخلكش تسرق دوري وأنا موجود
اللي أنا أعرفه إن العشم إني أقولك ..
اللى انا عاوز أقوله. .
مش تقول على لساني اللي انت عاوز تقوله عني.
ياترى فهمت ..ولا لسه…ماهو لو كنت لسه مافهمتش
يبقى انت مش متخيل اللي ممكن يحصلك على إيدي
وهتلاقي الموضوع قلب معايا عكس ما أنت متصور تماما
ساعتها..لما تغضب وتزعل وتتقمص ووشك.
يجيب الوان الطيف السبعه…هقولك بكل برود واريحيه
هو إنت زعلت ولا إيه. …
ده بس كان من عشمي فيك
لو عشمك على حساب كرامتي وشخصيتي
يبقى تغور انت وعشمك في داهيه..
#مجرد _خاطرة
ا د فتحي الشرقاوي
أستاذ علم النفس بجامعة عين شمس
