د.فتحي اعرف منين إن جوزي مش طايقني ؟؟

بقلم .. اد.فتحي الشرقاوي

بسيطه ياهانم .. هاقولك شوية تصرفات.

لو بيعملها معاك يبقى اعرفي إنه مش طايقك

وساعتها شوفيلك صرفه …

#اول مؤشر…

كل ما تيجي تتكلمي قدامه في اي موضوع

سواء مهم او حتى تافه بيتريق عليكي….

ويسخر منك ويستهزأ بكلامك

#تاني مؤشر..

مايحلالوش نقدك وإظهار كل عيوبك.إلا قدام الناس

خاصة المقربين ليكم أنتم الاتنين.علشان يبينلهم

إنه قد إيه مستحملك غصب عنه ياعيني 🤣

#ثالث مؤشر..

الكلمة الحلوة مابتطلعش من بؤقه ابدا تيجي مناسبات

وتروح أعياد وهو عامل زي القفا واكل سد الحنك

#رابع مؤشر..

كل حاجه هو بيحبها وبتعمليها.علشانه يصدك وينفر منك

ويحسسك إنه مش عاوزها

#خامس مؤشر ..

تواجده معاك في البيت نادركأن بيته زي الفندق

يادوب ياكل ويشرب ويغير هدومه وبعدين ينزل

ويرجع بالليل علشان يتخمد وينام بس.

#سادس مؤشر ..

مابيحبش يقعد معاكي على انفرادولو لقى نفسه

وجها لوجه معاكي هيشغل نفسه بالهباب اللي اسمه الموبايل والجيمز( الالعاب) اللي مابتخلصش (بابجي)😂

#سابع مؤشر ..

بيهرب من أداء اي مسؤوليات تخصك

وتخص الأولاد والبيت

ويوم ما تطلبي منه حاجه تخص بيتكم كأنك ضربتيه بمدفع رشاش 😄

وينفعل عليك كأنك بتطلبي حاجه غريبه وعجيبه

وهاتك يازعيق وخناق وخصامات.

#ثامن مؤشر..

لما تكوني تعبانه ومضغوطه وقرفانه من الدنيا واللي فيها

هو بيكون في عالم تاني لا حاسس بيك

ولا شاعر بوجعك

ولا متعاطف معاك ويمكن كمان ينتقدك إنك بتتمارضي وبتمثلي إنك تعبانه..

#تاسع مؤشر..

ما من مرة تتناقشوا في موضوع إلاويطلعك

مابتفهميش وهو ابو العريف وهو بس اللي بيفهم الكوفت

وهو لو مؤاخذه حمار حصاوي بودنين وكل قراراته فاشله😆

#عاشر مؤشر..

مابيحبش ياخدك معاه في اي مناسبة اجتماعية

إذا كان هو مش طايقك وانتم لوحدكم، يبقى هيطيقك

إزاي وانتم مع بعض قدام الناس ،

هتقولولي…طيب نعمل ايه..

اقولكم.. 

ربنا #ياخدكم أنتم الاتنين #ويريحنا منكم ومن #قرفكم..ياوش #النكد انت وهو

😀😁😆🤣😄😂

#مجرد _خاطرة

ا. د فتحي الشرقاوي

أستاذ علم النفس بجامعة عين شمس