بقلم .. ا.د فتحي الشرقاوي
في صنف من الناس ..
مابيفهموش بالتلميح…ولا بالتلئيح
ياريت يبقى كلامنا وتصرفاتنا معاهم بالتصريح
هتفضل تكشر في وشهم وتتقمص …
وتعمل فيها مقهور وزعلان منهم…
على أمل إنهم هيجولك ويطبطبوا عليك
ويجبروا بخاطرك ويبوسوا راسك ويصالحوك
ويقولوك حقك علينا.
ياعزيزي..ياعزيزتي…
دي ناس مفيش رجا منهم باردين وزي الحيطه ووشهم زي قفاهم
مابيفهموش بالتلميح ولا التلئيح ….
ولا بيفهموا الألغاز ولا من تحت لتحت..
ولا الكلام المتغطي…مابيفهموش تعبيرات الوش
ولابيفهموا معاني نبرات اصواتنا واحنا بنكلمهم.
ولا بيفهموا لغة عيونا واحنا بنبصلهم.
ولابيفهموا لغة اجسامنا واحنا بنتحرك قصادهم.
علشان كده..لما تبقى مقموص وزعلان منهم
ماتقولش هم هيفهموا ان انا زعلان منهم ..
من غير مااقولهم اني زعلان ومقموص منهم
مش هيفهموا تعبيراتك خالص…
فياريت ماتراهنش مع الصنف البارد ده..
انهم هيفهموك من غير ماتقولهم ايه اللي مضايقك منهم.
في ناس بيزعلوا وبياخدوا مواقف مننا .
من غير حتى ما نعرف ليه واخدين موقف مننا
السؤال للقماص ده ..
إزاي بتحاسب حد على حاجه هو نفسه ممكن مايكونش عارفها
القماصين كتروا قوووي في حياتنا..
فجأة تلاقيهم زعلانين منك وأنت مش فاهم اي سبب لزعلهم منك
وطبعا حضرتك تفضل تفكر ليه ؟ وازاي وامتى ؟ وفين ؟
وفي الغالب مابتوصلش لحاجة ولا لإجابه.
زي الست اللي تدي جوزها بوز ووش جبس وبلاستك
وتفضل مقموصة على الحال المهبب ده كام يوم.
و جوزها المسكين مش عارف هى ليه بتعمل كده معاه
طيب ايه اللي يمنعك ياياقماصه إنك تقوليله على إللي مزعلك منه
إيه اللي يمنعك إنك تصارحيه بسبب زعلك منه.
مش إحتمال إنه ما يعرفش أنه زعلك.
مش إحتمال إنه مكانش يقصد يزعلك.
ليه أخذت منه موقف الزعل بدون ما تقوله انك زعلان منه.
إنت تعرف أن الواحد فينا لو محدش قاله صراحة.
إنه زعلان ليه وبسبب كذا بيعمل ايه ؟
ممكن يفسر ابتعادك عنه بأي أسباب غير اللي في دماغك ياقماص.
طول ياقماص ما قولتش للي انت مقموص منه..
ليه انت مقموص منه واعتمدت على انه هيحس بغلطه
وهيجيلك يعتذرلك كل ما كنت انت اللي غلطان..مش هو…
روح له من اقصر طريق وقوله انا زعلان منك
علشان انت عملت معايا كذا وقولت عليا كذا
لو صمم على تقصيره معاك ومااعتذرش
ساعتها.
يبقى عرفت حقيقته واتصرف معاه زي ما انت عاوز.
لأن في إحتمال كبير قوووي إنه ما كانش قاصد يضايقك
ونيته ناحيتك كويسه.
يبقى ما ناباكش غير سوء نيتك بيه وحرقة دمك
فترات طويله وانت شايل منه.
عاتبوا بعض برفق ومحبه وموده..
صفوا اللي بينكم أول بأول..❤❤❤
#مجرد _خاطرة
ا د فتحي الشرقاوي
أستاذ علم النفس بجامعة عين شمس
